Եղիշե Մելիքյանը «Փյունիկը» գլխավորել է 2021 թվականի հունվարին։ Տեղին է նշել, որ այդ պահին մեր թիմը Հայաստանի Պրեմիեր լիգայի առաջնությունում ընթանում էր իր համար ոչ պատվաբեր՝ վերջին տեղում։

Մելիքյանին աստիճանաբար հաջողվեց կարգավորել մեր թիմի խաղը․ 2021/22 թթ․ մրցաշրջանում նրա գլխավորությամբ՝ «Փյունիկը» վերելքով անցկացրեց ողջ առաջնությունն ու իր պատմության ընթացքում 15-րդ անգամ հռչակվեց Հայաստանի չեմպիոն։ Դա 2015 թվականից ի վեր մեր թիմի առաջին նվաճումն էր։

Էլ ավելի տպավորիչ էին նրա գլխավորությամբ «Փյունիկի» ելույթները 2022/23 թթ․ մրցաշրջանի եվրագավաթներում։ Մեր թիմը հայկական ֆուտբոլի պատմության մեջ առաջին անգամ դուրս եկավ Չեմպիոնների լիգայի խաղարկության 3-րդ փուլ, ապա ելույթները շարունակելով Կոնֆերենցիաների լիգայի խաղարկության խմբային փուլում, հիշարժան հաղթանակներ տարավ։

Հաջորդ մրցաշրջանում «Փյունիկը» մինչև վերջին տուրը պայքար մղեց չեմպիոնության համար՝ ի վերջո բավարարվելով արծաթե մեդալներով։ 2023 թվականի ամռանը Մելիքյանի թիմը կրկին հաջող հանդես եկավ եվրագավաթներում ու 6 խաղերից 4-ում տոնեց հաղթանակ։

2023/24 թթ․ մրցաշրջանում Եղիշե Մելիքյանը «Փյունիկի» հետ երկրորդ անգամ դարձավ Հայաստանի չեմպիոն։ Առաջնության ընթացքում մեր թիմն աչքի ընկավ անզիջում խաղով ու կամային բարձր հատկանիշներով։ Հատկապես կարևոր հանդիպումներում Մելիքյանի անսպառ էներգիան ու հաղթելու ահռելի ցանկությունը փոխանցվում էր թիմի ֆուտբոլիստներին։ Նախորդ տարվա ամռանը մեր թիմը հասավ մինչև Կոնֆերենցիաների լիգայի խաղարկության փլեյ-օֆֆ փուլ։

«Փյունիկում» աշխատելու ընթացքում Մելիքյանը 2 անգամ (2021/22 և 2023/24 թթ․) ճանաչվել է Հայաստանի Պրեմիեր լիգայի մրցաշրջանի լավագույն մարզիչ և 2 անգամ (2022 և 2024 թթ․) արժանացել է ՀՖՖ-ի կողմից անցկացվող Հայաստանի տարվա լավագույն մարզիչ կոչմանը։

Ընդհանուր առմամբ, Եղիշե Մելիքյանը «Փյունիկի» ղեկին անցկացրել է 193 խաղ, որոնցում տարել է 114 հաղթանակ։ Այդ ցուցանիշներով՝ 46-ամյա մասնագետը դարձել է «Փյունիկի» ղեկին ամենաշատ խաղեր անցկացրած մարզիչն ու հաղթանակների քանակով ռեկորդակիր։

Եղիշե Մելիքյանն ավելի քան 4,5 տարիների ընթացքում «Փյունիկում» ունեցած իր մարզչական հաջողություններով արդեն իսկ իր անունն է գրել մեր ակումբի պատմության մեջ։

«Փյունիկ» ՖԱ-ն շնորհակալություն է հայտնում Եղիշե Մելիքյանին և իր մարզչական շտաբին՝ մեր թիմում գրանցած հաջողությունների ու պրոֆեսիոնալ աշխատանքի համար։ Մաղթում ենք Եղիշե Մելիքյանին արդյունավետ աշխատանք Հայաստանի ազգային հավաքականի ղեկին։