Ներկայացնում ենք «Փյունիկի» գլխավոր մարզիչ Եղիշե Մելիքյանի ֆուտբոլային անցած ուղղու մասին 15 առավել հետաքրքիր փաստեր։

1. Եղիշե Մելիքյանն իր առաջին ֆուտբոլային քայլերը կատարել է ֆուտբոլի հանրապետական մարզադպրոցում (ներկայիս «Ուրարտու» ֆուտբոլային ակումբի ակադեմիա)։ Դեռ պատանի տարիքից հաստատապես ցանկություն ունենալով դառնալ ֆուտբոլիստ, 10 տարեկանից սկսած նա հաճախել է Մալաթիայի ֆուտբոլի մարզադպրոց, որը գտնվում էր անմիջապես իր բնակության վայրին մոտ։

2. Եղիշե Մելիքյանի առաջին պրոֆեսիոնալ ակումբը եղել է նորաստեղծ Երևանի «Երևանը», որի կազմում 1995թ.-ին նա իր նորամուտն է նշել Հայաստանի Բարձրագույն խմբի առաջնությունում։ Սակայն ֆուտբոլային ճանապարհը դեռևս նոր սկսած Մելիքյանի համար ստացած ծանր վնասվածքը և մի քանի վիրահատությունները կարող էին խաչ քաշել նրա հետագա կարիերայի վրա, ինչի հետևանքով նա շուրջ 2 տարի խաղադաշտ դուրս չի եկել։

                                       Արտաշատի «Դվին» թիմը (1997թ.)

3. Ապաքինվելով ծանր վնասվածքից, Մելիքյանը հանդես է եկել Արտաշատի «Դվինում», որի կազմում 1996/97թթ. մրցաշրջանում նվաճել է Հայաստանի Բարձրագույն խմբի ուղեգիր։

4. Իր առաջին գոլը Հայաստանի Բարձրագույն խմբի առաջնություններում Եղիշե Մելիքյանը խփել է հենց «Դվինի» կազմում՝ 1998թ.-ի հոկտեմբերի 28-ին, առաջնության 7-9-րդ տեղերի համար խաղում գրավելով «Ղարաբաղի» դարպասը։

Հայաստանի չեմպիոն Արարատի «Ցեմենտը» (1999թ.)

5. 1999թ.-ի առաջնության առաջին խաղաշրջանի ավարտից հետո, նա համալրել է Հայաստանի չեմպիոն Արարատի «Ցեմենտի» շարքերը, ապա շարունակել է ելույթները վերանվանված «Արաքսում»։ 2001-02 և 2007-08թթ. Եղիշե Մելիքյանը խաղացել է Երևանի «Բանանցում», եղել է վերջինիս ավագը, իսկ 2009-10թթ. որոշակի ժամանակահատված հանդես է եկել Երևանի «Ուլիսում»։

Հայաստանի Բարձրագույն խմբի առաջնություններում նա անցկացրել է 164 խաղ և խփել 15 գնդակ։

                                 Եղիշե Մելիքյանը՝ Հայաստանի գավաթով (2007թ.)

6. Մելիքյանը 1 անգամ դարձել է Հայաստանի չեմպիոն («Արաքս», 2000թ.), 1 անգամ՝ փոխչեմպիոն («Բանանց», 2007թ.), 3 անգամ՝ երրորդ մրցանակակիր («Ցեմենտ», 1999թ., «Բանանց», 2002թ., «Ուլիս», 2010թ.) և 2 անգամ՝ Հայաստանի գավաթակիր («Ցեմենտ», 1999թ., «Բանանց», 2007թ.)։

Հայաստանի 2002թ.-ի տարվա լավագույն ֆուտբոլիստ մրցույթում Եղիշե Մելիքյանը 7-8-րդ տեղերն է կիսել Արամ Հակոբյանի հետ, ինչպես նաև ընդգրկվել է 2002թ.-ի Հայաստանի առաջնության խորհրդանշական հավաքականում։

Դոնեցկի «Մետալուրգի» նորեկների շնորհանդեսը (2003թ. մարտ)

7. 2003թ.-ի փետրվարին, Մելիքյանը 3 տարվա պայմանագիր է կնքել Դոնեցկի «Մետալուրգի» հետ, որի կազմում 2002/03 և 2004/05թթ. մրցաշրջաններում դարձել է Ուկրաինայի առաջնության բրոնզե մեդալակիր։ Դոնեցկյան թիմում Մելիքյանը ելույթ է ունեցել մինչև 2006թ.-ի ամառ, որից հետո կես մրցաշրջան վարձավճարով խաղացել է Ալչևսկի «Ստալում»։ Նա հանդես է եկել նաև Լուգանսկի «Զարյայում» (2009թ.), «Կրիմտեպլիցայում» (2010թ.) և Ուժգորոդի «Գովերլայում» (2011-12թթ.)։

Եղիշե Մելիքյանը՝ Դոնեցկի «Մետալուրգի» կազմում ՈւԵՖԱ-ի գավաթի խաղարկության իտալական «Պարմայի» դեմ խաղից առաջ (2003թ.)

8. Իր առաջին գոլն Ուկրաինայի Բարձրագույն խմբում Մելիքյանը խփել է 2004թ.-ի հունիսի 10-ին՝ առաջնության 28-րդ տուրի շրջանակներում Դոնեցկի «Մետալուրգի» կազմում գրավելով Լուցկի «Վոլինի» դարպասը։

9. Ուկրաինայի Պրեմիեր լիգայի առաջնություններում Եղիշե Մելիքյանն անցկացրել է 86 խաղ (Դոնեցկի «Մետալուրգում»՝ 58, Ալչևսկի «Ստալում»՝ 9, Լուգանսկի «Զարյայում»՝ 14, Ուժգորոդի «Գովերլայում»՝ 5)։

Այդ ցուցանիշով, նա Ուկրաինայի Բարձրագույն խմբի առաջնություններում հանդես եկած հայ ֆուտբոլիստների մեջ զբաղեցնում է 4-րդ տեղը՝ զիջելով միայն Արմեն Հակոբյանին (211 խաղ), Հենրիխ Մխիթարյանին (109 խաղ) և Գեղամ Ղադիմյանին (95 խաղ)։

Իսկ ահա Դոնեցկի «Մետալուրգի» կազմում, որտեղ ուկրաինական թիմերից ամենաշատ թվով հայ ֆուտբոլիստներն են հանդես եկել, Մելիքյանն առաջնությունում անցկացրած խաղերի քանակով զիջում է միայն Գևորգ Ղազարյանին (59 խաղ):

10. Թեև Ուկրաինայի Բարձրագույն խմբում Եղիշե Մելիքյանն աչքի է ընկել 4 անգամ, սակայն այդ գոլերից երկուսը տարբեր վարկածներով ճանաչվել են տուրի լավագույն գոլեր։

2006թ.-ի հոկտեմբերի 1-ին, Ուկրաինայի առաջնության 9-րդ տուրում, Եղիշե Մելիքյանը Ալչևսկի «Ստալի» կազմում 81-րդ րոպեին հեռահար հարվածով գրավել էր Դոնեցկի «Շախտյորի» դարպասը՝ դառնալով իր թիմի միակ գոլի հեղինակը (1-3)։ Այդ գոլն Ուկրաինայի հեռուստատեսային «Գոլ» հեռուստածրագրով ճանաչվել էր տուրի ամենագեղեցիկը և նույն հեռուստածրագրի կողմից ընդգրկվել էր նաև սեպտեմբեր ամսվա լավագույն գոլ անվանակարգի 4 հավակնորդների շարքում։

Իսկ 2012թ.-ի օգոստոսի 11-ին, Եղիշե Մելիքյանը հանդես գալով Ուժգորոդի «Գովերլայի» կազմում, 54-րդ րոպեին տուգանայինից կատարած հարվածով անակնկալի էր բերել Դնեպրոպետրովսկի «Դնեպրի» դարպասապահ Յան Լաշտուվկային։ Նրա խփած այդ գնդակն ուկրաինական UA-Football կայքում անցկացված հարցմամբ ճանաչվել էր 5-րդ տուրի լավագույն գոլը։

11. Հետաքրքիր է, որ Հայաստանում հանդես գալու ժամանակահատվածում Մելիքյանին երկու անգամ հաջողվել է գրավել «Փյունիկի» դարպասը։

2002թ.-ի ապրիլի 13-ին, Հայաստանի Բարձրագույն խմբի առաջնության անդրանիկ տուրի «Փյունիկ» - «Բանանց» (3-1) մրցավեճում, «Բանանցի» ավագ Եղիշե Մելիքյանը 75-րդ րոպեին գրավել էր «Փյունիկի» ռուս դարպասապահ Ռուսլան Լյաշչուկի դարպասը։

Իսկ 5 տարի անց՝ 2007թ.-ի հունիսի 14-ին, Հայաստանի Բարձրագույն խմբի 9-րդ տուրի «Փյունիկ» - «Բանանց» (5-1) խաղում, կրկին «Բանանցի» ավագի պարտականությունները կատարող Մելիքյանը 11-րդ րոպեին հեռահար հարվածով գրավել էր «Փյունիկի» կամերունցի դարպասապահ Ջիոֆակ Միլլերի պաշտպանած դարպասը՝ դառնալով գեղեցիկ գոլի հեղինակ։

12. Մինչ Հայաստանի ազգային հավաքականում ելույթներ ունենալը, Եղիշե Մելիքյանը 1998-2001թթ. հանդես է եկել Հայաստանի երիտասարդական հավաքականում, որի կազմում անցկացրել է 11 հանդիպում։

Երիտասարդական հավաքականում նա իր նորամուտը նշել է 1998թ.-ի հոկտեմբերի 13-ին, Կիևում կայացած Ուկրաինայի երիտասարդական հավաքականի դեմ (0-8) խաղում՝ 84-րդ րոպեին փոխարինելով Ռոմիկ Խաչատրյանին։

Հոլանդիա - Հայաստան խաղից առաջ (2005թ.)

13. Հայաստանի ազգային հավաքականում Եղիշե Մելիքյանն իր նորամուտը նշել է 2002թ.-ի հոկտեմբերի 16-ին, Աթենքում կայացած Եվրո-2004-ի ընտրական փուլի Եվրոպայի ապագա չեմպիոն Հունաստանի հավաքականի դեմ (0-2) խաղում՝ խաղադաշտ դուրս գալով 81-րդ րոպեին։ Նրան առաջին անգամ ազգային հավաքական էր հրավիրել մեր ընտրանու այն ժամանակվա գլխավոր մարզիչ արգենտինացի Օսկար Լոպեսը։

Ընդանուր առմամբ, Եղիշե Մելիքյանը Հայաստանի ազգային հավաքականում անցկացրել է 30 խաղ, որոնցում աչքի է ընկել 2 գոլային փոխանցմամբ։

Իր վերջին խաղը Հայաստանի ազգային հավաքականում նա անցկացրել է 2007թ.-ի սեպտեմբերի 12-ին, Մալթայի ընտրանու դեմ ընկերական խաղում։

14. 2013թ.-ի տարեսկզբին, Եղիշե Մելիքյանն ավարտել է ֆուտբոլիստի իր կարիերան, որից հետո անցել է մարզչական աշխատանքի՝ մարզելով Դոնեցկի «Մետալուրգի» մինչև 18 տարեկանների թիմը։ 2015թ.-ին նա աշխատել է «Մետալուրգի» Մ19 և Մ21 թիմերի հետ։ Մարզչական կարիերայում Մելիքյանի հաջորդ ակումբը եղել է Կամենսկի «Ստալը», որտեղ նա 2016-17թթ. գլխավորել է «Ստալի» Մ19 և Մ21 թիմերը, ապա 2017/18թթ. մրցաշրջանի մեկնարկից առաջ ստանձնել է Կամենսկի «Ստալի» գլխավոր մարզչի ղեկը։ 2019/20թթ. մրցաշրջանում Մելիքյանը դարձել է Ուկրաինայի Պրեմիեր լիգայում հանդես եկող «Լվովի» գլխավոր մարզիչը, որտեղ մինչ այդ աշխատել է մարզչի օգնականի կարգավիճակում։ 2020թ.-ի ամռանը, նա վերադարձել է Հայաստան և գլխավորել Երևանի «Ալաշկերտը»։

2020թ.-ի արդյունքներով Եղիշե Մելիքյանն ընդգրկվել է Հայաստանի տարվա լավագույն մարզիչ անվանակարգի 6 թեկնածուների ցանկում։

15. Մելիքյանն ունի ՈւԵՖԱ-ի մարզչական PRO կարգի արտոնագիր։ Նա համակարգել է Ուկրաինայի ֆուտբոլի ֆեդերացիայի կողմից կազմակերպված PRO արտոնագրի դասընթացները: