Մեկամսյա ուսումնամարզական հավաքի ընթացքում «Փյունիկը» կանցկացնի երրորդ ընկերական հանդիպումը:
Մեր առաջիկա մրցակիցը Ղազախստանի գործող չեմպիոն «Օրդաբասին» է: Մեր մրցակիցի համար այս խաղը ևս երրորդն է հավաքի ընթացքում, մինչև մեզ հետ հանդիպումը «Օրդաբասին» երկու խաղում նույն` 0:1 հաշվով պարտվել է «Պրիշտինային» (Կոսովո) և «Լեգիային» (Լեհաստան):
Թիմի պատմությունը սկսվում է 21-րդ դարի սկզբից, երբ Շիմկենտ քաղաքի երկու ակումբներ՝ «Ժիգեր» և «Տոմիրիս» միավորվել ու ներկայացել են «Օրդաբասի» անվանումով (նախկինում` «Դոստիկ» ): Կարճ ժամանակահատվածում «Օրդաբասին» վերելքի ուղի է բռնել և լուրջ հաջողությունների հասել երկրում: Այսօր ուսումնասիրելու ենք` որտեղից են գալիս մեր առաջիկա մրցակցի ակունքներն ու, թե ովքեր են գունավորել ժամանակին Շիմկենտ քաղաքը:
«Օրդաբասիի» ակունքները. նախ «Ժիգեր», հետո արդեն՝ «Տոմիրիս»
Շիմկենտ քաղաքի առաջին ակումբը կրել է «Դինամո Շիմկենտ» անվանումը, որը ստեծվել է 1949 թվականին: Հետագայում, մինչև լուծարումը, թիմը ունեցել է 5 տարբեր անվանումներ, սակայն ամենազգալի հաջողությունները գրանցել է «Ժիգեր» անունով:
Խորհրդային Միության տարիներին այս թիմը որևէ եղանակ չի ստեղծել ներքին առաջնություններում, սակայն ԽՍՀՄ փլուզումից հետո՝ 1992 թվականին, «Ժիգերը» ընդգրկվել է Ղազախստանի առաջնությունում:
Անդրանից մրցաշրջանում 4-րդ տեղը զբաղեցնելուց հետո սկսում է թիմի անկումը. շուտով նրանք դուրս են մնում դուրս առաջնության լավագույն տասնյակից, 1994 թվականին «Ժիգերը» գավաթի խաղարկությունում հասնում է մինչև քառորդ եզրափակիչ, սակայն դիմակայությունում 0:1 հաշվով ճանապարհը զիջում է Կարագանդայի «Շախտյորին»:
Կառուցողական նախագծի մեկնարկը
Ճգնաժամային ժամանակներում «Օրդաբասին» դադարեցնում է մասնակցությունը երկրի գլխավոր առաջնությանը, սակայն 2003 թվականին` նորից վերադառնում:
Ղազախական ակումբի պատմության առաջին ոսկե էջը գրվում է 2011-ին, երբ նրանք Ղազախստանի գավաթի խաղարկության եզրափակիչում հանդիպում են գործող չեմպիոն «Տոբոլին», որը ֆավորիտի կարգավիճակով էր մոտենում հանդիպմանը: Խաղի 40-րդ րոպեին Մուխտար Մուխտարովը գլխով կատարում է անկասելի հարված և օգնում «Օրդաբասիին» պատմություն կերտել:
Մեկ տարի հետո «Օրդաբասին» երկրորդ տիտղոսն է նվաճում. նրանք Ղազախստանի Սուպերգավաթի եզրափակիչում նվազագույն հաշվով առավելության են հասնում «Շախտյորի» նկատմամբ:
Եվրագավաթային ճանապարհ
«Օրդաբասին» եվրագավաթներում շոշափելի հաջողություններ չունի: Թիմը երկրորդ փուլից բարձր առաջ գնալ չի կարողացել ոչ մի մրցաշարում:
Շիմկենտ քաղաքի ներկայացուցիչները իրենց անդրանիկ փորձը Եվրոպայի լիգայի որակավորման առաջին փուլում ավարտել են հաղթանակով սերբական «Յագոդինայի» նկատմամբ: Սակայն հետո ղազախները ճանապարհը զիջել են նորվեգական «Ռուսենբորգին»՝ դիմակայությունում պարտվելով 3:4 հաշվով:
Կրկնակի հաջողություն
«Օրդաբասին» 2022 թվականին դառնում է Ղազախստանի գավաթի խաղարկության հաղթող: «Ակժայիկի» հետ որոշիչ խաղը դրամատիկ է ստացվում ու ավարտվում 5:4 հաշվով: Էլխան Աստանովը լրացուցիչ ժամանակի 119-րդ րոպեին մոտենում է 11 մետրանոց նշակետին և, անվրեպ իրացնելով այն, իր թիմին օգնում է նվաճել գավաթը:
Սակայն հաջորդ տարում պետք էր տեղի ունենալ ակումբի պատմության գլխավոր իրադարձությունը: 2023 մրցաշրջանում «Օրդաբասին» շշմեցրեց բոլորին ու 16-խաղյա անպարտելի շարք գրանցելուց հետո իր պատմության մեջ առաջին անգամ տիրացավ բաղձալի չեմպիոնությանը:
Պայքար առաջարկելով Ղազախստանի հսկաներին` 50-ամյա մասնագետ Ալեքսանդր Սեդնևը և նրա տղաները հետևում թողեցին «Աստանային»: «Օրդաբասին» նաև ամենաարդյունավետն էր գոլային տարբերությամբ՝ 48 խփած, 21 բաց թողածի դիմաց: 
Չեմպիոնական տարում ամենաարդյունավետը Ասխատ Տագիբերգենն էր, որը դարձավ 11 գոլի և 12 գոլային փոխանցման հեղինակ: Իսկ թիմի պատմության լավագույն ռմբարկուն Դաուրենբեկ Տաժիմբետովն է՝ 40 գոլով:
Լեգեոնականներ և ազգային հավաքական
«Օրդաբասիում» լեգիեոնականները 10-ն են, թիմի միջին տարիքը` 27.6:
Ղազախստանի ազգային հավաքական «Օրդաբասիից» հրավիրվում է 4 ֆուտբոլիստ: Նրանցից Ասխատ Տագիբերգենը գլխավոր դերակատարներից էր, երբ ազգային թիմին մեկ քայլ էր բաժանում Եվրոյի որակավորումից, իսկ նրա գոլը Դանիայի դարպասը նոմինացվել էր Պուշկաշի անվան մրցանակին: Տագիբերգենը ներքին առաջնությունում ստացել էր ծանր վնասվածք, որի պատճառով բաց էր թողել ազգային հավաքականի վերջին երկու որոշիչ խաղերը: «Օրդաբասիի» առաջատարը, ամենայն հավանականությամբ, բաց կթողնի նաև մեր դեմ հանդիպումը:
Ներկայիս «Օրդաբասին». ինչ է առաջարկում Ալեքսանդր Սեդնևը
Բելառուս մասնագետը թիմին հիմնականում խաղադաշտ է դուրս բերում 3-4-2-1 դասավորությամբ: «Օրդաբասին» խաղերի մեծամասնությունում տիրում է նախաձեռնությանն ու աչքի ընկնում հարձակողական ֆուտբոլով: Սեդնևը այս թիմի գլխավոր մարզչի ղեկը ստանձնել է 2021 թվականի հունվարին: Ղազախական ակումբի հետ փորձառու մասնագետը նվաճել է երկրի գավաթն ու հաղթել առաջնությունում:
«Օրդաբասին» վերջին պաշտոնական հանդիպումը անցկացրել է նախորդ տարվա նոյեմբերին՝ գավաթի եզրափակիչում պարտվելով «Տոբոլին» (0:1): Դրանից առաջ հետևել են առաջնության հանդիպումները, որտեղ մեր մրցակիցը վերջին 5 խաղում տոնել է երեք հաղթանակ և կրել երկու պարտություն:
