«Փյունիկը» Fastex Հայաստանի Պրեմիեր լիգայի 10-րդ տուրում Չարենցավանում 3:1 հաշվով հաղթեց «Վանին»:
Հանդիպման սկզբնամասն անցավ առանց վտանգավոր պահերի: Այս խաղում առաջին գոլը խփվեց 33-րդ րոպեին. Ագդոն Մենեզեսի գլխով կատարած հարվածից հետո գնդակը հետ մղվեց հորիզոնական դարպասաձողից, սակայն բրազիլացին ավելացրեց և բացեց հաշիվը:
Գոլ հանդերձարանում ասվածն այս անգամ ի օգուտ մեզ աշխատեց. 45-րդ րոպեին` անկյունային խաղարկումից հետո, Յուսուֆ Օտուբանջոն, լինելով թիկունքով դարպասին, բիլիարդային փոխանցում կատարեց Կարաբալյոյին, իսկ վենեսուելացին գլխի անկասելի հարվածով գտավ դարպասի իննյակը՝ 2:0
Երկրորդ խաղակեսում «Փյունիկը» գրագետ ֆուտբոլ ցույց տվեց և թույլ չտվեց չարենցավանցիներին սպառնալ Բուչնևի դարպասին:
Հաղթողի հարցը փակվեց հանդիպման հիմնական ժամանակի ավարտից 13 րոպե առաջ, երբ մեր կայծակնային հակագրոհն ավարտվեց Ջեյմս Սանտոսի գոլով: «Վանը», ամեն դեպքում, մեկ գնդակ հետ բերեց, որն իր անվան դիմաց գրանցեց Կաջալի Դրամեն:
Այս խաղը նշանավորվեց նաև մի քանի հոբելյաններով: Յուսուֆ Օտուբանջոն անցկացրեց իր 100-րդ պաշտոնական հանդիպումը մեր թիմի գույներով: Յուրահատուկ նվաճման հասավ նաև մեր կիսապաշտպան Արտակ Գրիգորյանը: 36-ամյա ֆուտբոլիստը Հայաստանի առաջնություններում անցկացրեց իր 400-րդ պաշտոնական հանդիպումը: Միխայիլ Կովալենկոն ևս հատեց 100 խաղի շեմը Հայաստանի Բարձրագույն խմբում:
Եղիշե Մելիքյանի թիմը միջազգային դադարի է գնում 2-րդ հորիզոնականով՝ վաստակած 19 միավորով:՝ պահեստում ունենալով մեկ հանդիպում «Գանձասարի» հետ:
