«Փյունիկը» Fastex Պրեմիեր լիգայի 28-րդ տուրում հյուրընկալվելիս 1:0 հաշվով հաղթեց «Վեստ Արմենիային»:
Հանդիպման առաջին խաղակեսում մեր թիմը միտված էր մրցակցի դարպասին և կարողացավ առաջինը բացել խաղի հաշիվը: Տանտերերի դարպասապահի ուժեղ փոխանցումից հետո երկրորդ հարկում հաջող գործեց Անտոն Բրատկովը, ում փոխանցումին արձագանքեց Թեմուր Ջիկիան և գնդակը ուղարկեց Սերժ Դեբլեին, որից հետո կոտդիվուարցի հարձակվողը հաջող եզրափակեց մեր գրոհը:
Հորդառատ անձրևի պատճառով ֆուտբոլիստները դժվարությամբ էին գնդակը տեղաշարժում, որի պատճառով հաջողության չէին հասնում մի շարք գրոհներ:
Երկրորդ խաղակեսում մեր թիմն ուներ լավ պահեր, հաշիվը կրկնապատկել կարող էին Միխայիլ Կովալենկոն, Դանիիլ Կուլիկովը, բայց եզրափակումները գոլով չավարտվեցին:
«Փյունիկի» հաջորդ հանդիպումը կկայանա ապրիլի 29-ին՝ Հայաստանի գավաթի խաղարկության կիսաեզրափակչի շրջանակում՝ «Արարատ-Արմենիայի» հետ Ավանի ֆուտբոլի ակադեմիայում:
