Վրաստանի մայրաքաղաքում ընթացող ուսումնամարզական հավաքի շրջանակում «Փյունիկը» սեպտեմբերի 9-ին ստուգողական հանդիպում կանցկացնի Թբիլիսիի «Սաբուրթալոյի» հետ:
Ակումբը հիմնադրվել է 1999 թվականին և կոչվել Թբիլիսիի համանուն թաղամասի անունով։ Հետաքրքիր է, որ Սաբուրթալո վրացերենից բառացիորեն թարգմանվում է «գնդակ խաղալու տեղ»։
2005 թվականից ակումբը կենտրոնացել է իր ակադեմիայի զարգացման, վրացի փորձառու մասնագետների հրավիրելու և Իսպանիայի ֆուտբոլի ֆեդերացիայի հետ համագործակցության հաստատման վրա։ 2014/15 մրցաշրջանից սկսած «Սաբուրթալոն» ցածր դիվիզիոններից բարձրացել ու հաստատվել է երկրի բարձրագույն առաջնությունում՝ Երովնուլի լիգայում:
2018/19 մրցաշրջանում թիմը դարձել է Երովնուլի լիգայի չեմպիոն և նվաճել ՈւԵՖԱ-ի Չեմպիոնների լիգայի որակավորման փուլի ուղեգիր։
«Սաբուրթալոն» իր նորամուտը եվրոպական գլխավոր ակումբային մրցաշարում նշել է բավական վառ` հաղթանակ տանելով մոլդովական Շերիֆի» նկատմամբ, որը այն ժամանակ եվրագավաթների մշտական մասնակից էր, դուրս էր գալիս եվրագավաթների որակավորման փուլ և համարվում դիմակայության ֆավորիտ ու նվաճում խմբային փուլի ուղեգիր:
Որակավորման առաջին փուլում տպավորիչ ելույթից հետո վրացական թիմը չի կարողացել շրջանցել Զագրեբի «Դինամոյին» և պայքարը շարունակել է Եվրոպա լիգայում, որտեղ էլ ճանապարհը զիջել է «Արարատ-Արմենիային»: Հետագա մրցաշրջաններում «Սաբուրթալոն» կրկին նվաճել է եվրոպական մրցաշարերի որակավորման փուլի ուղեգիր, սակայն չի կարողացել մտնել խմբային փուլ։
2019 և 2021 թվականներին «Սաբուրթալոն» նվաճել է Վրաստանի գավաթը, իսկ 2020 թվականին՝ Սուպերգավաթը։
Այժմ «Սաբուրթալոյի» կազմում 9 սան է խաղում։ Թիմի միջին տարիքը 25,2 է։ Ընթացիկ մրցաշրջանի 24 տուրից հետո թիմը 45 միավորով, խփած ու բաց թողած 26 գոլերի տարբերությամբ զբաղեցնում է 3-րդ տեղը։ Այս պահին ամենաարդյունավետ խաղացողը կենտրոնական հարձակվող Չեյկնե Սիլան է՝ 11 գոլ և 4 գոլային փոխանցում։
Անցյալ տարվա հունվարից թիմը մարզում է Օմարի Թեթրաձեն, որը նախկինում աշխատել է Ղազախստանի Պրեմիեր լիգայի, Ռուսաստանի բարձրագույն ու երկրորդ դիվիզիոնը ներկայացնող ակումբների հետ։
«Սաբուրթալոյի» հետ կհանդիպենք այս շաբաթ օրը՝ սեպտեմբերի 9-ին, ժամը 17:00-ին։
Մաղթում ենք դիտարժան հանդիպում:
