«Փյունիկը» այս տարի պայքարը սկսել էր Չեմպիոնների լիգայի որակավորման առաջին փուլից։ Մեր թիմը, ցավոք, չկարողացավ շրջանցել Մինսկի «Դինամոյին» ու եվրագավաթներում պայքարը շարունակելու է Կոնֆերենցիաների լիգայի որակավորման 2-րդ փուլից։ Այստեղ մեր մրցակիցը Հյուսիսային Մակեդոնիայի գործող չեմպիոն «Ստրուգան» է, որը ամենաբարձր վարկանիշ ունեցող եվրոպական մրցաշարում ճանապարհը զիջել է Բրատիսլավայի «Սլովանին»։

«Փյունիկը» առաջին անգամ է հանդիպելու «Ստրուգային»։ Այնուամենայնիվ, Հայաստանի գործող չեմպիոնը եվրոպական ասպարեզում Հյուսիսային Մակեդոնիան ներկայացնող թիմերի հետ հանդիպել է 8 անգամ և երբեք պարտություն չի կրել՝ 5 հաղթանակ, 3 ոչ-ոքի և 14։7-ի գոլային հարաբերակցություն։

Հյուսիսմակեդոնական թիմերի հետ դիմակայություններում մեր ամենաարդյունավետ ֆուտբոլիստը Էդգար Մանուչարյանն է` 3 գոլով։ Վիուլեն Այվազյանն ու Բակար Բալդեն աչքի են ընկել երկուական անգամ։

Մեր մամուլի ծառայության խոշորացույցի տակ «Ստրուգան» է, որն ունի 9 տարվա պատմություն:

Ակումբի ստեղծումը

2015-ին հիմնադրումից հետո ակումբը հանդես է եկել Հյուսիսային Մակեդոնիայի 4-րդ դիվիզիոնում ու աստիճանաբար բարելավել դիրքերը:

Պետք է ասել, որ երկրի հզորությամբ երկրորդ լիգայում թիմերը բաժանված են երկու տարբեր խմբերի՝ արևմուտք և արևելք: Եվ ահա, «Ստրուգան» 2018/19 մրցաշրջանի արդյունքներով արևմուտքի թիմերի շրջանում զբաղեցրել է առաջին հորիզոնականը և ձեռք բերել առաջին լիգայում` ներքին գլխավոր առաջնությանը, մասնակցելու իրավունք:

«Ստրուգան» ամրապնդվում է թոփերի շարքերում

Նորամուտի մրցաշրջանում «Ստրուգան» մրցաշարային աղյուսակում վերջինն էր՝ 10-րդը` վաստակած 25 միավորով: 

Մինչդեռ, 2020/21 մրցաշրջանում մեր մրցակիցը ոչ միայն պահպանում է տեղը ուժեղագույնների խմբում, այլև ապացուցում, որ արժանիորեն է հայտնվել այդտեղ. նրանք 57 միավորով մրցաշարային աղյուսակում զբաղեցնում են 3-րդ տեղը և ձեռք բերում Կոնֆերենցիաների լիգայի խաղարկության որակավորման փուլի ուղեգիր: 

 2022/23 մրցաշրջանում «Ստրուգան» առաջին անգամ իր պատմության մեջ հասնում է շոշափելի հաջողության` դառնալով երկրի չեմպիոն: 

Ազգային առաջնության հաղթողը այդ մրցաշրջանում 30 խաղից 20-ում տոնել էր հաղթանակ, գրանցել 8 ոչ-ոքի և կրել ընդամենը երկու պարտություն: 

Այդ մրցաշրջանում տպավորություն է թողնում արդեն ակումբի լեգենդի կարգավիճակ ունեցող Բեսարտ Իբրաիմին, որը 18 գոլով գլխավորում է մրցաշրջանի լավագույն ռմբարկուների մրցավազքը:  Հետաքրքրական է` Իբրաիմին 2009/10 մրցաշրջանում «Շալկե-04»-ի կազմում դարձել է Բունդեսլիգայի փոխչեմպիոն: 
Անցած մրցաշրջանում չեմպիոնության համար պայքարը ձգվում է մինչև վերջին տուրը: «Ստրուգան» և «Շկենդիան» առաջնությունը ավարտում են հավասար՝ 64-ական միավորով: Ի վերջո, Հյուսիսային Մակեդոնիայի չեմպիոնի տիտղոսը լրացուցիչ ցուցանիշներով պաշտպանում է «Ստրուգան»: Նախորդ մրցաշրջանում նույնպես չեմպիոնական կազմից լավագույնը Բեսարտ Իբրաիմին էր, որը լավագույն ռմբարկուի կոչմանը հասնում է խփած 15 գոլով:

Եվրոպական ուղին

Ինչպես արդեն նշել էինք վերևում, «Ստրուգան» առաջին փորձը եվրագավաթներում կատարել է 2021/22 մրցաշրջանում՝ մասնակցելով Կոնֆերենցիաների լիգայի որակավորման առաջին փուլին: Հյուսիսմակեդոնական թիմի համար պայքարն ավարտվել է հենց նույն փուլում՝ Լատվիան ներկայացնող «Լիեպայայից» կրած 2:5 հաշվով պարտությամբ: 

«Ստրուգան» իր երկիրը Չեմպիոնների լիգայում առաջին անգամ ներկայացրել է անցած մրցաշրջանում, որտեղ ևս պայքարը լքել է առաջին փուլում: Հետաքրքական է, որ «Ստրուգան» պարտվել է «Ժալգիրիսին», որին մեր թիմը հաղթել էր 2022/23 մրցաշրջանում Կոնֆերենցիաների լիգայի խաղարկության խմբային փուլի տնային խաղում (2:0):

Ինչպես հիմա, այնպես էլ նախորդ մրցաշրջանում, Հյուսիսային Մակեդոնիայի չեմպիոնը նահանջել էր Կոնֆերենցիաների լիգայի խաղարկության 2-րդ փուլ, որին հաջորդել են «Ստրուգայի» առաջին եվրագավաթային հաղթանակները: Հյուսիսմակեդոնացիները հետևում էին թողել չեռնոգորական «Բուդուչնոստիին» և Լյուքսեմբուրքի «Հեսպերանժիին» ու նրանց մեկ քայլ էր բաժանում մրցաշարի խմբային փուլից:

Սակայն իսլանդական «Բրեյդաբլիկը» երկու խաղերում տանում է նվազագույն հաշվով հաղթանակներ ու առաջ անցնում (1:0), (0:1): 

Ընթացիկ մրցաշրջանի Չեմպիոնների լիգայի որակավորման առաջին փուլում «Ստրուգային» բաժին էր հասել Բրատիսլավայի «Սլովանը»: Երկխաղյա դիմակայության արդյունքում, Սլովակիայի չեմպիոնը 6:3 հաշվով հաղթեց հյուսիսմակեդոնական մրցակցին և դուրս թողեց ուժեղագույնների պայքարից: 

Ներկայի հերոսները

«Ստրուգան» ֆուտբոլային աշխարհում նոր անուն է և հետք թողած ֆուտբոլիստները մինչև այժմ պաշտպանում են թիմի գույները: Մեր մրցակցի թիմի միջին տարիքը 26,8 է։ 

Հյուսիսմակեդոնական ակումբի պատմության լավագույն ռմբարկուն Բեսարտ Իբրաիմին ակումբի կազմում 68 խաղից հետո դարձել է 43 գոլի հեղինակ: 
Ամենաշատ հանդիպում անցկացրած ֆուտբոլիստը Բունյամին Շաբանին է: 33-ամյա ֆուտբոլիստը 133 խաղի է մասնակցել հարազատ դարձած թիմի կազմում: Հետաքրքական է, որ Շաբանին երբեմն հանդիսացել է նաև Գյումրիի «Շիրակի» ֆուտբոլիստը:

«Ստրուգայից» 3 ֆուտբոլիստ հրավիրվում է Հյուսիսային Մակեդոնիայի երիտասարդական հավաքական։

Քաթիփ Օսմանին` հյուսիսմակեդնոկան ակումբային ֆուտբոլի գործող անձանցից մեկը

«Ստրուգան» այս տարվա մայիսից մարզում է Քաթիփ Օսմանին։ 55-ամյա մասնագետը «Շկենդիայի» հետ 3 անգամ դարձել է Հյուսիսային Մակեդոնիայի չեմպիոն: 2018/19 մրցաշրջանում այդ ակումբը Օսմանիի գլխավորությամբ հասել է Չեմպիոնների լիգայի որակավորման 3-րդ փուլ՝ հաղթահարելով Ուելսը ներկայացնող «Նյու-Սեյինթսի» և մոլդովական «Շերիֆի» արգելքը։

Եվրագավաթային արկածները Օսմանիի գլխավորությամբ ավարտվել են երկու անընդմեջ պարտությամբ` Չեմպիոնների լիգայի 3-րդ փուլում «Ռեդ Բուլ Զալցբուրգից» և Եվրոպա լիգայի որակավորման փլեյ-օֆֆ-ում նորվեգական «Ռուսենբորգից»։

Օսմանիի գլխավորած թիմերը Մակեդոնիայի ներքին առաջնությունում 363 խաղից հաղթել են 171-ում։

55-ամյա մասնագետի սիրելի դասավորությունը 4-2-3-1-ն է։ Օսմանին հիմնականում դավանում է ինտենսիվ ֆուտբոլ, դրա վառ ապացույցը «Շկենդիայի» 2017/18 չեմպիոնական մրցաշրջանն է, որտեղ թիմը 36 խաղից հետո հեղինակել էր 101 գնդակ՝ 48-ով ավելի մոտակա մրցակցից։

Մեր նախկին ֆուտբոլիստները «Ստրուգայում»

Հետաքրքական է, որ «Փյունիկի» գույները պաշտպանած և Հյուսիսային Մակեդոնիայի հավաքականում հանդես եկող Կիռե Ռիստևսկին, Մարյա Ռադեսկին և Ստեֆան Սպիրովսկին այս պահին հանդես են գալիս «Ստրուգայի» կազմում։

Նրանցից բացի, «Ստրուգային» այս տրանսֆերային պատուհանի ընթացքում միացել է 6 նոր ֆուտբոլիստ։