Փյունիկը շարունակում է վստահ քայլերով շարժվել առաջ և արդեն Կոնֆերենցիաների լիգայի որակավորման փլեյ-օֆֆում է, որտեղ ուժերն է չափելու Սլովենիայի չեմպիոն «Ցելեի» հետ: Քաղաքի համանուն թիմը այստեղ է նահանջել Եվրոպա լիգայի որակավորման երրորդ փուլից` դիմակայությունում զիջելով «Շեմռոկ Ռովերսին» (1:0, 3:1): Հայաստանի չեմպիոնն էլ անառիկ պահելով սեփական դարպասն ուժեղ է եղել ղազախական «Օրդաբասիից» (0:1, 1:0):
«Ցելեն» Սլովենիայի ազգային առաջնությունը՝ Առաջին լիգան, չի լքել դրա ստեղծումից մինչև այսօր: Ակումբը մարզում է նախկին հանրահայտ ֆուտբոլիստ, որը բոլորովին վերջերս է սկսել մարզչական գործունեություն ծավալել:
Մեր ակումբի մամուլի ծառայության խոշորացույցի տակ է որակավորման փուլի մեր վերջին մրցակցի անցած ճանապարհը:
«Ցելեի» ստեղծման պատմությունը
Ցելե քաղաքում ֆուտբոլի պատմությունը սկսվում է 20-րդ դարի սկզբից` 1919-ից, երբ պաշտոնապես ստեղծվել է «Ցելեն»: Երկրորդ Համաշխարհային պատերազմին նախորդող տարիներին ակումբը խաղացել է երկրի առաջնությունում և լիգայի տարբեր մրցաշարերում:
Երկրորդ Համաշխարհային պատերազմի ընթացքում սլովենական ակումբների լուծարումից հետո քաղաքում ստեղծվել է Ցելեի «Ֆիզկուլտուրնո Դրուստվոն» և «Օլիմպ» սպորտային ասոցիացիան: Աշնանը երկու ակումբները միավորվել են «Կլադիվար» ֆուտբոլային ակումբի հետ, որը հետագայում պետք է փոփոխվեր ու կրեր քաղաքի անունը: 
Անկախությունից առաջ ամենամեծ հաջողությանն ակումբը հասել է 1963-64 մրցաշրջանում, երբ հաղթել է և՛ Հանրապետության լիգան, և՛ գավաթը։ Այնուհետև, «Կլադիվարը» որակավորման փուլի հանդիպումներ է անցկացրել և ապահովել իր տեղը Հարավսլավիայի երկրորդ դաշնային լիգայում՝ Արևմուտքում, որտեղ անցկացրել է երկու մրցաշրջան:
Սլովենիայի և «Ցելեի» «անկախացումը»
Մինչև Սլովենիայի անկախացումը և նույնիսկ դրանից հետո, ակումբը մի քանի անգամ անվանափոխվել է:
1991 թվականից սկսած Սլովենիան անցկացնում էր սեփական առաջնությունները` որպես անկախ պետություն: Նոր առաջնության ստեղծումից հետո «Ցելեից» գրեթե 11 տարի է պահանջվել շոշափելի հաջողության հասնելու համար. նրանք դարձել են երկրի փոխչեմպիոններ:
Մինչև Առաջին լիգայի բաղձալի չեմպիոնությունը, «Ցելեն» մեկ անգամ ևս դարձել է երկրի փոխչեմպիոն: Սակայն, այդ ընթացքում, թիմը կարողացել է իր պատմության առաջին տիտղոսը նվաճել 2004/2005 մրցաշրջանում՝ սլովենացիները դարձել են գավաթի խաղարկության հաղթող:
«Ցելեն» վերջ է դնում «մանուշակների» միապետությանը ու նոր էջ բացում իր պատմության մեջ
Երբ Սլովենիայում բոլորի համար արդեն օրինաչափություն էր տեղական ամենատիտղոսակիր ակումբի` «Մարիբորի» գերակայությունը, հորիզոնում է հայտնվում «Ցելեն»: 2019/20 մրցաշրջանում մեր առաջիկա մրցակիցները ընդհատում են «մանուշակների» հեգեմոնիան առաջնությունում 8 անընդմեջ չեմպիոնություններից հետո:
2 միավորի առավելությամբ «Ցելեն» հետևում է թողնում նաև «Լյուբլյանային»` պատմության մեջ առաջին անգամ դառնալով Սլովենիայի չեմպիոն ու սկիզբ դնելով ակումբի համար փառահեղ ժամանակաշրջանի: 
2023/24 մրցաշրջանում «Ցելեն» չեմպիոնության է հասնում փորձառու թիմին բնորոշ քայլվածքով։ Քաղաքային թիմը առաջ է անցնում «Մարիբորից» ոչ ավել, ոչ պակաս 12 միավորով և այս անգամ ոչ մի հնարավորություն չի տալիս մրցակիցներին։
Նախորդ մրցաշրջանում «Ցելեի» գերակայության մասին ամբողջական պատկերացում կազմելու համար բավական է ասել, որ առաջնության լավագույն ռմբարկուների հնգյակը կազմված էր բացառապես քաղաքային թիմի ֆուտբոլիստներից։ Սլովենացի Ալյոշա Մատկոն 18 գոլով առաջատարն էր այս ցանկում։ Մատկոն երկու անգամ աչքի է ընկել Չեմպիոնների լիգայի այս մրցաշրջանի որակավորման խաղերում։
Հավատարիմ ֆուտբոլիստները
«Ցելեն» հայտնի է իր հավատարիմ ֆուտբոլիստներին պատվելու ու ինչպես հարկն է մեծարելու փիլիսոփոյությամբ:
Ակումբի գույներով Սեբաստիան Գոբեցը 430 հանդիպում է անցկացրել. բացի ռեկորդային լինելուց, այս ցուցանիշը զարմացնում է որ ոչ տիտղոսակիր թիմերում քիչ ֆուտբոլիստներն են այսքան հավատարմություն դրսևորում։
Իր կարիերայում տարբեր ակումբային գրանցումներ ունեցած Դոմինիկ Բերսնայկը հասցրել է հետք է թողնել նաև «Ցելեի» պատմության մեջ. նա 47 գոլով ակումբի պատմության լավագույն ռմբարկուն է։
Եվրո 2024-ում «Ցելեի» ֆուտբոլիստը Ռոնալդուի, Բելիգնեմի և այլ աստղերի դեմ
«Ցելեից» Սլովենիայի ազգային հավաքական է հրավիրվում 3 ֆուտբոլիստ, որոնցից Դավիդ Զեցը և Տամար Սվետլինը այս տարի են նշել նորամուտը ազգային թիմում։
Բոլորվին առանձին է Ժան Կարնիչնիկի կարգավիճակը, որը Սլովենիայի ազգային հավաքականի փորձառու ֆուտբոլիստներից մեկն է: Ժանը այս տարի մասնակցել է Եվրո 2024-ին և ամբողջական խաղեր անցկացրել խմբային փուլում` Անգլիայի, Դանիայի և Սերբիայի հետ, այնուհետև փլեյ-օֆֆում՝ Պորտուգալիայի։ Սլովենիան Եվրոպայի առաջնությունում խփել է 2 գոլ, որից մեկը Ժանը հեղինակել է Սերբիայի հետ խաղում (1:1)։
«Ցելեին» ժամանակին տխրեցրել է Սերգեյ Վակուլենկոն
Սլովենիայի գործող չեմպիոնը նախկինում առաջնությունում մրցանակային տեղեր գրավելու շնորհիվ ձեռք է բերել Եվրոպա լիգայի որակավորման փուլում հանդես գալու իրավունք։ 2003 թվականից մինչև 2015-ը նրանք 5 անգամ մասնակցել են այս մրցաշարին, սակայն լքել են պայքարը առաջին կամ էլ երկրորդ փուլից:
2020/21 մրցաշրջանում Սլովենիայի չեմպիոնները առաջին անգամ մասնակցել են Չեմպիոնների լիգային: Համավարակով պայմանավորված՝ եվրագավաթային այդ մրցաշրջանում բոլոր դիմակայությունները բաղկացած էին մեկ հանդիպումից։
«Ցելեն» ընդամենը օրեր առաջ գլխիկոր հեռացավ Իռլանդիայից, մինչդեռ տարիներ առաջ մեկ այլ իռլանդական թիմի էր նույն զգացողությունը պարգևել՝ շանս չտալով «Դունդալկին»։
Այս հաղթանակից հետո «Ցելեի» համար անհաղթահարելի արգելք էր դարձել նորվեգական «Մոլդեն», որին երկրի չեմպիոնները զիջել էին 1։2 հաշվով։
Պարտվելով գլխավոր եվրագավաթում` սլովենացիները նահանջել էին Եվրոպա լիգայի որակավորման երրորդ փուլ։ «Ցելեն» այդ ժամանակ Երևանում հյուրընկալվեց «Արարատ-Արմենիային» և պարտվեց 0։1 հաշվով՝ ավարտելով եվրոպական մրցելույթները։ Հատկանշական է, որ այդ խաղի հաղթական գոլը խփեց մեր թիմի պաշտպան Սերգեյ Վակուլենկոն՝ լրացուցիչ ժամանակի 111-րդ րոպեին։ Բացի Սերգեյից, այդ ժամանակ հայկական ակումբի գույները փյունիկցիներից պաշտպանում էին Ալեմաոն և Յուսուֆ Օտուբանջոն:
Ընթացիկ մրցաշրջանում «Ցելեն» կրկին պայքարը սկսել էր Չեմպիոնների լիգայից։ Առաջին փուլում քաղաքային թիմը դիմակայությունում 7։1 հաշվով վստահ առավելության էր հասել էստոնական «Ֆլորայի» նկատմամբ։ Հաջորդ փուլում մրցակցի հարցում սլովենացիներին կրկին բախտը չէր ժպտացել. փորձառու «Սլովանը», որը արդեն այդ մրցաշարի փլեյ-օֆֆում է, դիմակայությունում 6։1 հաշվով հաղթել է «Ցելեին»։ Հետաքրքրական է, որ ԿԼ-ի երկրորդ փուլում մեր մրցակից «Ստրուգային» նույնպես պայքարից դուրս էր թողել «Սլովանը»:
Ինչպես նշել էինք վերևում, Սլովենիայի չեմպիոնները, մինչև մեզ հանդիպելը պարտություն էին կրել Իռլանդիայի չեմպիոն «Շեմռոկ Ռովերսից» (1:0, 3:1):
«Ցելեի» նորեկները` անվանի ակումբներից
Ամառային տրանսֆերային պատուհանի ընթացքում «Ցելեն» համալրվել է 14 ֆուտբոլիստով: Նորեկներից Սամո Մատյաժը նախկինում հանդես է եկել Ա Սերիայի գործող չեմպիոն «Ինտերի» տարբեր տարիքային թիմերում: Նորեկներից մյուսը՝ Իվան Բրնիչը, պաշտպանել է հունական «Օլիմպիակոսի» գույները:
Հայ երկրպագուներին ամենաշատը ծանոթ կլինի «Ցելեի» նորեկ Կլեման Լերնոյի անունը, որը անցած մրցաշրջանում «Արարատի» կազմում մրցել է «Փյունիկի» հետ:
Ջերարդի խաղընկեր, Իսպանիայի ազգային հավաքականի նախկին ֆուտբոլիստ. Ո՞վ է «Ցելեի» գլխավոր մարզիչը
«Ցելեն» այս տարվա հուլիսից մարզում է 42-ամյա Ալբերտ Ռիերան, որը մարզչական գործոնեություն սկսել է ծավալել 2020 թվականից:
Կարիերայի սկզբում, իսպանացին 2 տարի աշխատել է գլխավոր մարզչի օգնական թուրքական «Գալաթասարայում»:
Որպես գլխավոր մարզիչ` նա առաջին քայլերը կատարել է Լյուբլյանայի «Օլիմիպիայի» հետ և այն հաջողված է եղել. 2022/23 մրցաշրջանում երիտասարդ մարզիչը դարձել է Սլովենիայի չեմպիոն ու գավաթակիր:
Ռիերայի ֆուտբոլիստի կարիերան մեկ այլ պատմություն է: Նա «Գալաթասարայի» կազմում 2 անգամ դարձել է Թուրքիայի չեմպիոն և նույնքան անգամ Սուպեգավաթակիր, մեկ անգամ էլ նա բարձրացրել է երկրի գավաթը: «Մալյորկայի» կազմում նախկին կիսապաշտպանը հաղթել է Իսպանիայի գավաթի խաղարկությունում: Նույն հաջողությունը Ռիերան մեկ անգամ էլ գրանցել է Հունաստանում՝ «Օլիմպիակոսի» կազմում:
Ռիերան 2007-ից 2009 թվականներին հրավիրվել է Իսպանիայի ազգային հավաքական և անցկացրել 16 հանդիպում:
Նա ակումբային կարիերայի ընթացքում խաղացել է «Լիվերպուլի» կազմում՝ լինելով լեգենդար Սթիվեն Ջերարդի և այլ աստղերի թիմակիցը: Մառախլապատ Ալբիոնում նա հասցրել է պաշտպանել նաև «Մանչեսթեր Սիթիի» գույները:
Իսպանացի մասնագետը նախընտրում է հարձակողական ֆուտբոլ և հաճախ է գործածում 4-3-3 դասավորությունը:
Սլովենիայի նոր մեկնարկած առաջնությունում «Ցելեն» անցկացրել է 4 հանդիպում, տոնելով 2 հաղթանակ և գրանցելով մեկական ոչ-ոքի ու պարտություն: Պահեստային մեկ հանդիպում ունենալով` մեր առաջիկա մրցակիցը վաստակած 7 միավորով 6-րդն է մրցաշարային աղյուսակում:
