Ձմեռային դադարից հետո վերսկսված Fastex Հայաստանի Պրեմիեր լիգայի 20-րդ տուրում «Փյունիկը» հյուրընկալվեց «Ալաշկերտին»։
Մեր թիմի կազմում հենց մեկնարկային րոպեներից խաղադաշտ դուրս եկան «Փյունիկի» նորեկ Ժոել Բոպեսուն և երկարատև դադարից հետո թիմ վերադարձած Վարազդատ Հարոյանը, ով ստանձնել էր թիմի ավագի պարտականությունները։
Հանդիպման առաջին վտանգավոր պահը ստեղծեցին տանտերերը, երբ Չապի Կատոյի հարվածից հետո Ստանիսլավ Բուչնևը մեծ դժվարությամբ շեղեց գնդակի ուղղությունը։
20-րդ րոպեին «Փյունիկն» արդեն կարող էր առաջ անցնել հաշվի մեջ, սակայն Ագդոն Մենեզեսը նպաստավոր դիրքից չկարողացավ ճիշտ եզրափակել Յուսուֆ Օտուբանջոյի փոխանցումը։
Այնուամենայնիվ, մեկ րոպե անց Ագդոն Մենեզեսին հաջողվեց բացել խաղի հաշիվը։ Սանի Բուհարին ձախ թևից ճեղքեց մրցակցի պաշտպանությունն ու գնդակը հասցեագրեց Մենեզեսին, ով էլ մոտ տարածությունից գրավեց «Ալաշկերտի» դարպասը։
Ընդունած գոլից հետո «Ալաշկերտի» ֆուտբոլիստները փորձեցին հետ բերել կորցրածը և մեկ րոպեի ընթացքում երկու անգամ լրջորե նսպառնացին «Փյունիկի» դարպասին։
Երկրորդ կեսի միջնամասում տանտերերը ևս երկու լավ հնարավորություն ունեցան հաշիվը հավասարեցնելու համար, բայց մի դեպքում՝ Գևորգ Տարախչյանի վտանգավոր հարվածը փոքր-ինչ շեղ ընթացավ, ապա վայրկյաններ անց՝ «Ալաշկերտի» հաջորդ գրոհի ժամանակ գնդակը հետ մղվեց մեր թիմի դարպասաձողից։
Խաղավարտից 15 րոպե առաջ Եղիշե Մելիքյանն ասպարեզ դուրս բերեց «Փյունիկի» նորեկներից ևս երկուսին՝ Դանիիլ Կուլիկովին և Մատաս Վարեյկային։ 81-րդ րոպեին Սանի Բուհարին կարող էր կրկնապատկել հաշիվը, բայց Գոռ Մանուկյանը փրկեց իր թիմին։
Ի վերջո, ավելացված ժամանակի վերջին րոպեին Յուսուֆ Օտուբանջոն հիանալի փոխանցումով մեն-մենակ դուրս բերեց Մատաս Վարեյկային, ով դիպուկ հարվածով դրեց հանդիպման վերջակետը։ Լիտվացի ֆուտբոլիստն իր նորամուտը «Փյունիկում» նշեց խփած գոլով։
«Փյունիկը» հաղթեց 2:0 հաշվով և շարունակում է զբաղեցնել մրցաշարային աղյուսակի 3-րդ հորիզոնականը։
Հաջորդ տուրում՝ մարտի 1-ին, մեր թիմը սեփական հարկի տակ ուժերը կչափի «Արարատ-Արմենիայի» հետ։
