«Փյունիկ»-ը Հայաստանի գավաթի խաղարկության քառորդ եզրափակչի առաջին խաղում 7:2 հաշվով հաղթեց «Լեռնային Արցախ»-ին:
Առաջին խաղակեսն անցավ նռնագույնների առավելությամբ: Մեր տղաները երկու անգամ գրավեցին մրցակցի դարպասը. նախ, տուգանային հրապարակում, կիսաշրջադարձ հարվածով գեղեցիկ գոլ խփեց Թեմուր Ջիկիան, այնուհետև գրեթե նույն կերպ արդյունավետ հարված կատարեց Մատաս Վարեյկան:
Երկրորդ խաղակեսում մեր թիմը կարողացավ մեծացնել առավելությունը. փոխարինման մտած Պետրոս Ալեքյանն աջ եզրից գնդակը փոխանցեց Լևոն Պետրոսյանին, իսկ վերջինս առանց խնդիրների խփեց մեր երրորդ գնդակն այս խաղում: Եվս մեկ գնդակ փյունիկցիները խփեցին 6 րոպե անց՝ դուբլ ձևակերպեց Ջիկիան:
Հյուրերն Իլիա Տրինկոյի և Միլոշ Միլովանովիչի շնորհիվ կարողացան երկու գոլ հետ բերել: «Փյունիկը» խաղի մնացած ժամանահատվածում լուրջ առավելություն սահմանեց. հիմնական թիմում իր նորամուտը նշող Տիգրան Գևորգյանն աչքի ընկավ գոլով, մեկական անգամ էլ արդյունավետ գտնվեցին Լևոն Պետրոսյանը և Պետրոս Ալեքյանը:
Բացի Տիգրան Գևորգյանից, «Փյունիկի» հիմնական թիմում իրենց նորամուտն էին նշում մեր ակադեմիայի սաներ Արամ Ահարոնյանը և Մարատ Ասատրյանը:
Եղիշե Մելիքյանի գլխավորած թիմը հաջորդ հանդիպումը կանցկացնի մարտի 9-ին՝ «Ուրարտու»-ի դեմ՝ «Ջունիոր Սպորտ»-ում:
