Հայաստանի Առաջին խմբի առաջնության նախավերջին տուրում «Փյունիկ Ակադեմիան» սեփական հարկի տակ ընդունեց «Բենտոնիտին»:

Առաջին կեսում հաշիվը չբացվեց, սակայն ընդմիջումից հետո 58-րդ րոպեին մեր թիմի ավագ Տիգրան Գևորգյանը դիպուկ հարվածով բացեց խաղի հաշիվը՝ 1։0։

78-րդ րոպեին Արտյոմ Ալեքսանյանը մեն-մենակ դուրս եկավ դարպասապահի դեմ և նրա հարվածից հետո գնդակը վերջին պահին դիպավ «Բենտոնիտի» պաշտպան Հովհաննես Գևորգյանին ու հայտնվեց դարպասում՝ գրանցվելով որպես ինքնագոլ՝ 2։0։

Այս հաղթանակի շնորհիվ «Փյունիկ Ակադեմիան» վաստակեց 41 միավոր և բարձրացավ մրցաշարային աղյուսակի 6-րդ տեղ։

Նշենք, որ առաջնության վերջին հանդիպումը Լևոն Ստեփանյանի թիմը կանցկացնի մայիսի 26-ին՝ Չարենցավանում հյուրընկալվելով «Վան-2»-ին։